Dr Zibusafer u dr Gängumäni

Si schtöh anerä Schtrass. "U wi wärs de wemer iz eso u när eso?" "Das hesch scho vorhär vorgschlagä u i ha der doch xeit das das nid geit." Dr Zibusafer überleit. "Aber..." "Nei, kes aber," seit der Gängumäni, "eso geits nid. Mir müesse haut angers ume, gschtochä oder ghouä." "Aber i wott doch numä..." "Iz geits haut nid, iz muesch haut eifach schpurä." "Aber,..." "Los, chum iz! Fertig gchlönet. Sakremänt..."

D Uschpantrine u der Huschuwädi

"Gang iz furt!", seit är u git erä ä Gingg mitem Eubogä. " I wott doch numä luege", mulet si. "E du chasch de es angers mau luege." "I wott aber iz!" Dr Huschuwädi verträit d Ougä u seit: "Nei, chum iz!" "Läck, wi blöd isch de dä!", dängkt d Uschpantrine u zottlet beleidiget u schtouz ab.